Op Sondag 31 Mei 2026 is ’n betekenisvolle mylpaal in Die Voortrekkers se geskiedenis gevier toe die eerste Volwasse Kursusaanbieder-kentekens amptelik toegeken is. Hierdie besondere kenteken, uitgebeeld deur ’n goue fakkel, simboliseer kennis, leiding en die bereidwilligheid om ander toe te rus deur opleiding en mentorskap.
Die toekenning verleen nasionale erkenning aan goedgekeurde volwasse kursusaanbieders wat deur die jare hul kundigheid en ervaring beskikbaar gestel het om lede en offisiere te ontwikkel. Dit is ’n erkenning van die dikwels stil, maar onskatbare werk wat agter die skerms verrig word om sterk leiers vir die toekoms te vorm.
Tydens die geleentheid het Josua du Plessis, AHL Volwasse Sake, die betekenis van die dag treffend verwoord:
“Vandag is vir my ’n baie groot dag. Ons het lank gestry vir hierdie erkenning vir die uitgelese groepie mense wat goedgekeurde volwasse aanbieders is. Die eerste een gaan aan ons Hoofleier, Dr. Karin Stoffberg, omdat sy my ingesleep en opgelei het – en as ‘straf’ kry sy die eerste een!”
Sy woorde het nie net ’n glimlag ontlok nie, maar ook die diepe waardering weerspieël vir die persone wat hul tyd, energie en kennis opoffer om ander te ontwikkel. Die oomblik was gevul met dankbaarheid, kameraadskap en erkenning vir diensbaarheid wat oor baie jare bewys is.
Die eerste ontvangers van die Volwasse Kursusaanbieder-kenteken is:
- Dr. Karin Stoffberg (Hoofleier)
- Josua du Plessis (AHL Volwasse Sake)
- Dr. Gerhard Gericke (Gebiedsleier – Oosvaal)
- Englie Botha (AGL PD-Sake, Gebied Oosvaal)
- Annemarie Grobbelaar (Kommandoleier, Impala Voortrekkers)
- Louwrens Pretorius (AKL Verkenner Sake, Kompas Voortrekkers)
Hierdie ontvangers verteenwoordig die ideale van toegewyde leierskap en Christelike diensbaarheid. Hulle leef die beginsel uit dat ware leiers nie slegs leiding gee nie, maar ook ander toerus om hul volle potensiaal te bereik.
Die goue fakkel is daarom meer as net ’n kenteken. Dit is ’n simbool van lig wat aangesteek word om ander se pad te verhelder; van kennis wat gedeel word; en van ’n nalatenskap wat van geslag tot geslag oorgedra word. Elke kursus wat aangebied word en elke lid wat toegerus word, dra by tot die bou van ’n sterker Voortrekkerbeweging en ’n sterker gemeenskap.
Mag hierdie erkenning die ontvangers inspireer om voort te gaan om met passie en toewyding te dien, en mag hul voorbeeld nog vele ander aanmoedig om hul gawes in diens van die jeug, hul kultuur en hul geloof te gebruik.
Hou Koers! 🔥
